શ્રીલંકાએ ટેસ્ટ ક્રિકેટમાં રચ્યો ઈતિહાસ, વર્લ્ડ ટેસ્ટ ચેમ્પિયનશિપના ઈતિહાસમાં પહેલીવાર કોઈ ટીમે આવું કર્યું

શ્રીલંકા અને ન્યુઝીલેન્ડ વચ્ચે ટેસ્ટ સીરીઝની બીજી મેચ રમાઈ રહી છે. આ મેચમાં શ્રીલંકાની ટીમ શાનદાર ફોર્મમાં જોવા મળી હતી. શ્રીલંકાએ આ દરમિયાન એક મોટો રેકોર્ડ પોતાના નામે કર્યો છે. આ મેચમાં શ્રીલંકન ક્રિકેટ ટીમે પ્રથમ બેટિંગ કરતા 5 વિકેટ ગુમાવીને 602 રન બનાવ્યા હતા અને ત્યારબાદ તેના બોલરોએ શાનદાર પ્રદર્શન કર્યું હતું અને ન્યૂઝીલેન્ડને 88 રનમાં ઓલઆઉટ કરી દીધું હતું. આ સાથે ન્યુઝીલેન્ડને ફોલોઓનનો સામનો કરવો પડ્યો અને શ્રીલંકાને 514 રનની લીડ મળી ગઈ. આ સાથે ટેસ્ટ ક્રિકેટમાં આ ત્રીજી સૌથી મોટી લીડ છે જેમાં વિરોધી ટીમને ફોલોઓન આપવામાં આવ્યું છે. વર્લ્ડ ટેસ્ટ ચેમ્પિયનશિપના ઈતિહાસમાં આ સૌથી મોટી લીડ છે જ્યાં વિરોધી ટીમને ફોલોઓનનો સામનો કરવો પડ્યો છે.

ન્યુઝીલેન્ડ સાથે બીજી વખત આવું બન્યું છે

ન્યુઝીલેન્ડ ક્રિકેટ માટે અહીંથી આ મેચ જીતવી ઘણી મુશ્કેલ લાગે છે. તમને જણાવી દઈએ કે આ પહેલા વર્ષ 2002માં પણ ન્યૂઝીલેન્ડની ટીમ સાથે કંઈક આવું જ થયું હતું. જ્યારે તેની ટીમને પાકિસ્તાને 570 રનની લીડ સાથે ફોલોઓન આપ્યું હતું. આ સાથે ન્યૂઝીલેન્ડની ટીમ ટેસ્ટ ક્રિકેટના ઈતિહાસમાં પ્રથમ એવી ટીમ બની ગઈ છે, જેને વિરોધી ટીમે 500+ રનની લીડ મેળવીને બે વખત ફોલોઓન આપ્યું છે. આ પ્રકારનું ખરાબ ફોર્મ ન્યુઝીલેન્ડ ક્રિકેટ માટે ચિંતાનો વિષય છે.